Sunndig, 04.10.2026
Träffpunkt: Sunndig Morgä am 7bni bir Chlätterhalle,
ipackt häi mer z’Chlätterziig und d’Volleyballä.
Nach äre lengä Fahrt mit vil Turnpöisä bis uf Cassis,
häi mer iis gfreud, isch Chrigel scho da gsi und hed d’Villa gstellt fir iis.
Mit dr Awiisig «teed nid z’brav» und amenä fiisä lachä,
isch Chrigel gangä zum sälber Ferie machä.
Bim fäinä Znacht hockä 9 jungi Liit am Tisch.
Z’Gsprächsthema isch Thermomix, will dä macht anschiinend Salatsauce ganz frisch.
Mändig, 05.10.2026
Mit voll packtä Ruckseck sii mer los gangä.
Nach langem Abseilä häi mer 2 Meter ob Meer chennä hangä.
Wägä äs paar langsame Franzosä häi mer dert messä warte,
zum Glick häi mer drbee aber ä Üssicht gha we uf dr Poschtchartä.
Nachem Chlätterä und badä sii mer wiiter gah ichöifä,
mitem Satz «ROSENLAUI – Holy Spächt» häi mer Bärner gheerd verbii löifä.
Ziischtig, 06.10.2026
Bim Chlättere isches iis zwar nid immer gsii zum lachä,
aber egal ob z’gsteli oder nid, d’Johanna frägt: «Chasch äs Foto machä?»
Vor Anouk häi mer chennä leerä,
wennd nimme zur Wand chunsch, tösch am beschtä d’Üssicht gnessä unds äifach akzepteerä
Ufem Zruggwäg häi mer iis vo dä Bäimleni lah d’Bäi verchratzä
Bim Camping acho, gumpä usem Zält pletzli Tüübä und Chatzä.
Am spätä Abä bim Schisslä spilä
hed d’Anina usversehä z’»Glühbirne»-Chärtli iz brennendä Cherzli tribä
D’Anouk weckt d’Nadja ir Nacht voller Angscht, will z’Wasser stäid hech,
doch d’Nadja antwortet numä mit: «Anouk, dü bisch mer sooo nech!»
O d’Lynn wird ir Nacht voller Angscht gweckt,
Carla hed nämli Wasser underem Zält entdeckt.
«Mer si uf dr Luftmatratze we im Meer», säid si,
d’Lynn lengt a Bodä, säid «Näi, es isch no nid Morgä», dräit sich um und schlaft wider i.
Midwuch, 07.10.2026
Am Midwuch häi mer de dr Punkt erreicht,
wos iis während dr Seilhandhabig äifach total hed verseicht.
Mid Wassergräbä häi mer d’Zält vorem Undergang wellä rettä
zum Grabä häi mer alles brüücht, egal ob Gonfiglas oder Adilettä.
Bim Znacht häi mer irgendwe äs Täller z’vil gha,
doch iisä imaginär Gast dr Peter isch brav gsii und hed ke Räst glah.
Donschtig, 08.10.2026
Hiit am Morgä häi mer nid lang megä gwartä,
darum häi mer schnäll z’Ziig packt und sii i Chlättergartä.
«So, etz bini he», säid d’Lynn wenn si ir Wand stäid und nimme wiiter chund.
O bi de ander löifts nid immer numä rund.
Mirstral, was ä Namä fir nä Strum. Dä mös mä doch umbenennä
somit leerid ehr ez alli z’Theresli kennä.
Wo mer nachem Znacht richtig Meer sii gangä
häi mer d’Leonie lah uberä Rand üüs hangä.
So diräkt uberem Meer
kickt ihres Workout sicher sehr.
Wo mer nächär no a Strand si gangä
hed d’Provokation vom Theresli erscht so richtig agfangä.
Friitig, 09.10.2026
Am Friitig morgä bim Chlätterä iis bewusst wird,
dass z’Theresli iisi Provokation sehr wahrschiinlech hed gspirrd.
Ufem Wäg zrug zum Auto
häi d’Johanna, d’Anouk, d’Anina und d’Lynn z’Rennä mid Aisatä üüfgnoh.
Bim Parkplatz dunnä
gseh mer, dass mer z’Rennä endgültig häi gwunnä
Am abä bim Slacklinen häi mer üüsi gfundä, dass wem ä immer ghiid
mä sich äifach mös sägä «äs isch äifach» suscht wirz niid.
Samschtig, 10.10.2026
So schnäll chas gah
und mer messä Frankriich scho wider verlah.
Ufd Frag vor Fiona: «Was chennt äs anders Mal besser sii?»
chunnd vor Johanna: «Nächsts Jahr ohni Luft!» und somit isch d’Fragerundi verbii.
Vo derä Üssag isch z’Theresli eppä chli beleidigt
da isch gliich, dass sich d’Johanna vollgas verteidigt.
Scheen isch das Lager gsii
doch läider isch das etz scho verbii
Mer freuä iis aber scho nächst Jahr wider drbee z’sii!
Leebi Fiona, Leebä Clint – Dankä vil mal, häid ehr de Wuchä fir iis organiseert und mit iis verbracht.
